අධිකරණයෙන් / නඩු විභාගවලින් සිංහල භාෂාව ඉවත් කිරීමේ මාර්ග සිතියමේ ස්ථාන 10...! ( නීතියට ගරු කරන ජනතාවගේ දැන ගැනීම පිණිසයි)

අධිකරණයෙන් / නඩු විභාගවලින් සිංහල භාෂාව ඉවත් කිරීමේ මාර්ග සිතියමේ ස්ථාන 10...! (නීතියට ගරු කරන ජනතාවගේ දැන ගැනීම පිණිසයි) (නීතිඥ අරුණ ලක්සිරි උණවටුන B.Sc(Col), PGDC(Col) සමායෝජක - වෛද්‍ය තිලක පද්මා සුබසිංහ අනුස්මරණ නීති අධ්‍යයන වැඩසටහන, දුරකථන 0712063394 - 2021.02.21)

[දේශීයව සහ විදේශීයව නීති අධ්‍යාපනය සහ නීති උපාධිය ලබා දෙන ආයතන කිහිපයක් රටේ තිබුණද නීතිඥවරු ලෙස කටයුතු කිරීමට වෘත්තීය සුදුසුකම ලබා දෙන අධ්‍යාපනය සහ නීති විභාග සම්බන්ධයෙන් තීන්දු සහ තීරණ ගනු ලබන්නේ 1900 අංක 2 දරන නීති අධ්‍යාපන සභා අඥාපනතෙ 2 වන වගන්තිය මගින් පිහිටුවා ඇති අගවිනිසුරු, නීතිපති, අධිකරණ ඇමතිගේ නියෝජිතයන් 6ක් ඇතුලු සාමාජිකයන් 14කින් සමන්විත සංස්ථාගත නීති අධ්‍යාපන සභාවයි. ආණ්ඩුක්‍රම ව්‍යවස්ථාවේ 23 සහ 24වන ව්‍යවස්ථා මගින් නීති පැනවීමේ භාෂාව සහ අධිකරණ භාෂාව ලෙස සිංහල භාෂාව ඇතුලත් කිරීමත් සමගම එකී විධානයට ගරු කරමින් ශ්‍රී ලංකා නීති විද්‍යාලයේ ඉගැන්වීම් කටයුතු සහ විභාග පැවැත්වීම වර්ෂ 2010 දක්වා සිංහල මාධ්‍යයෙන් පවත්වනු ලැබීය. අධිකරණ භාෂාව සිංහල බවට පත් කිරීම නිසා සිය අභිමතය අවශ්‍ය ආකාරයට යොදා ගැනීමට නොහැකි වූ කණ්ඩායම් අධිකරණයෙන් සිංහල භාෂාව ඉවත් කිරීමට මාර්ග සිතියම් සැළසුම් කළේය. එකී මාර්ග සිතියම සැළසුම් කළ අය ගැන නොව එකී මාර්ග සිතියම ක්‍රියාත්මක කරමින් සිංහල භාෂාව අධිකරණයෙන් ඉවත් කිරීම කර ඇති ආකාරය කරුණු 10කින් මෙහි සදහන් කර ඇත.] 1. 2010 වර්ෂයේ සිටි අධිකරණ ඇමති සමයේ ශ්‍රී ලංකා නීති විද්‍යාල ප්‍රවේශ විභාගයෙන් සාමාන්‍යයෙන් වෙනත් වර්ෂවල සමත්වන සිසුන් සංයුතියට වඩා වෙනසක් දක්නට ලැබුණි. (මෙය දෙමළ මාධ්‍ය ප්‍රශ්න පත්‍රය පිටකිරීමෙන් වූ බවට අදහසක් ඇත) 2. මෙය පදනම් කර ගනිමින් එතෙක් එක් භාෂාවකින් පමණක් නීති ප්‍රවේශය ලිවීමට තිබූ අවස්ථාව අහිමි කළ අතර එතෙක් පැවති නීතියේ පසුබිම ප්‍රශ්න පත්‍රය ඉවත් කර සාමාන්‍ය දැනීම සහ භාෂා ප්‍රශ්න පත්‍රයක් හදුන්වා දෙනු ලැබීය. ( මේ හේතුවෙන් සිංහල භාෂාවෙන් ප්‍රවේශ විභාගය ලිවීමටත්, මූලික නීතිය ඉගෙනීමටත් තිබූ අවස්ථාව (නීතියේ පසුබිම ප්‍රශ්න පත්‍රය) සිංහල ජනතාවට අහිමි කළ අතර, වර්ෂ 2010 සිට ශ්‍රී ලංකා නීති විද්‍යාලයට සිසුන් ඇතුළත් කර ගන්නා ලද්දේ ඉංග්‍රීසි මාධ්‍යයෙන් පමණක් නීති අධ්‍යාපනය ලබා දීමටය. 3. එසේ වුවත් කොළඹ විශ්ව විද්‍යාලයේ නීති පීඨයේ, නාවල විවෘත විශ්ව විද්‍යාලයේ නීති අධ්‍යයන අංශයේ සිංහල මාධ්‍යයෙන් නීති උපාධිය ගත් අය නීතිඥ වෘත්තීයට පිවිසීමට පවත්වන විභාගවලට පෙනී සිටීමට ශ්‍රී ලංකා නීති විද්‍යාලයේ නීති විභාගවලට පැමිණෙන හෙයින් ශ්‍රී ලංකා නීති විද්‍යාලයේ විභාග පමණක් සිංහල භාෂාවෙන් පැවැත්වීම අඛණ්ඩව සිදු විය. (2010 දී සිටි අධිකරණ ඇමතිවරයාගේ සමයේ සිදු කර ගත්තේ ශ්‍රී ලංකා නීති විද්‍යාලයේ සිංහල භාෂාවෙන් නීති අධ්‍යාපනය ලබා දීම නතර කර ගැනීමත්, නීති ප්‍රවේශ විභාගය සිංහල මාධ්‍යයෙන් පමණක් පැවැත්වීම අහෝසි කර ගැනීමත් පමණි. එනම් 2010 දී ඉටු කර ගත්තේ අධිකරණයෙන් සිංහල භාෂාව ඉවත් කිරීමේ මාර්ග සිතියමෙන් 50% ක් පමණි) 4. වර්ෂ 2010 සිටි අධිකරණ ඇමති නතර කළ තැනින් ආරම්භ කර සිංහල භාෂාව නීති අධ්‍යාපනයෙන් සහ නීති විභාග වලින් සම්පූර්ණයෙන් (100%) ඉවත් කිරීමට 2020 දී අධිකරණ ඇමති සමයේ 2020.12.30 දිනැති සහ අංක 2208/13 අති විශෙෂ ගැසට් පත්‍රය මගින් සිදු කර ඇත.(එනම් අධිකරණයෙන් සිංහල ඉවත් කිරීමේ මාර්ග සිතියමෙන් 100% ම සම්පූර්ණ කර ගන්නා ලදී) 5. එනම් 2020.12.30 දිනැති එකී ගැසට්ටුවෙන් නීති විද්‍යාලයේ ඉගැන්වීම ඉංග්‍රීසියෙන් පමණක් සිදු කිරීමත්, විභාග පැවැත්වීමේදී ඉංග්‍රීසියෙන් විභාග ලිවීම අනිවාර්යය කිරීමත් සිදු කර ඇත. 6. ඒ අනුව කොළඹ විශ්ව විද්‍යාලයේ නීති පීඨයේ සහ නාවල විවෘත විශ්ව විද්‍යාලයේ නීති අධ්‍යයන අංශයේ සිංහල මාධ්‍යයෙන් ඉගෙන ගන්නා සිසුන් ශ්‍රී ලංකා නීති විද්‍යාලයේ ඉංග්‍රීසියෙන් නීති විභාග ලිවීම අනිවාර්යය කර ඇත. (මේ නිසා කොළඹ විශ්ව විද්‍යාලයේ  නීති පීඨයේ සහ නාවල විවෘත විශ්ව විද්‍යාලයේ නීති අධ්‍යයන අංශවල සිංහල මාධ්‍යයෙන් නීතිය ඉගෙනීම ස්ව්‍යංක්‍රීයවම නතර වන අතර සිංහල මාධ්‍යයෙන් ඉගෙන ගෙන ඉංග්‍රීසියෙන් පිළිතුරු ලිවීම ප්‍රායෝගික නොවන බව වටහා ගැනීම අසීරු නොවේ.) 7. ඒ සමගම ආණ්ඩුක්‍රම ව්‍යවස්ථාවේ 23 සහ 24 ව්‍යවස්ථා එනම් නීති පැනවීමේ සහ අධිකරණ භාෂා ව්‍යවස්ථා ස්ව්‍යං මරණයකට/ ස්වයං ඝාතනයකට / කෘතීම බල රහිත කිරීමකට පත්කර ඇති අතර, එම ව්‍යවස්ථාවලින් දක්වා ඇති සිංහල භාෂාවෙන් නීති පැනවීමේ සහ සිංහල අධිකරණ භාෂා බලය ක්‍රියාත්මක කිරීමට සුදුසු නීතිඥවරු සහ විනිසුරුවරු බිහිවීම ශ්‍රී ලංකා නීති විද්‍යාලය විසින් වැළක්වීම එයට හේතුවයි. ( සිංහලෙන් නීතිය ඉගෙනීම සහ සිංහලෙන් නීති විභාග නොලියා සිංහලෙන් නීති පැනවීම සහ සිංහල අධිකරණ භාෂා බලය ආරක්ෂා කිරීමට තාක්ෂණය නොදැනීම එයට හේතුවයි.) 8.මෙම ආණ්ඩුක්‍රම ව්‍යවස්ථා විධාන යටපත් කිරීමේ, මගහැර යාමේ ක්‍රියාව කර ඇත්තේ අධිකරණ ඇමතිවරයාත්, අගවිනිසුරු, නීතිපති, අධිකරණ අමාත්‍යාංශයේ ලේකම් ඇතුලු සංස්ථාගත නීති අධ්‍යාපන සභාවයි.(එහි සාමාජිකයන් 14කි) 9. මේ වැරදි ක්‍රියාව නිවැරදි කිරීමට අධිකරණයට යාම ප්‍රායෝගික නොවන්නේ "වැටත් නියරත් ගොයම් කා නම් කාට කියනුද ඒ අමාරුව" යන හේතුවෙනි. 10. ඒ අනුව වර්ෂ 2010 දී සිටි අධිකරණ ඇමති සමයේ ආරම්භ කළ සිංහල අධිකරණ භාෂා බලය අහිමි කිරීම 2020 දී අධිකරණ ඇමතිවරයා විසින් සම්පූර්ණ කර අවසන් කළේය. (ඒ ආණ්ඩුක්‍රම ව්‍යවස්ථාවේ 23, 24 ව්‍යවස්ථා ගැසට් පත්‍රයක් මගින් සංශෝධන වන ලෙස ක්‍රියා කිරීමෙනි.මෙය ප්‍රජාතන්ත්‍රවාදය යටපත් කරන බලහත්කාරය සහ නීති පැනවීම පිළිබද හොද උදාහරණයකි.) (නීතිඥ අරුණ ලක්සිරි උණවටුන 2021.02.21)