ශ්‍රේෂ්ඨාධිකරණ සහ අභියාචනාධිකරණ නඩු තීන්දු ලබා දිය යුතු භාෂාව සිංහල භාෂාව විය යුතුද? යන ප්‍රශ්නය ජනමතවිචාරණයකට යොමු කරන ලෙස ජනාධිපතිවරයාගෙන් කරන ඉල්ලීමට සහාය දෙන්න...
ශ්‍රේෂ්ඨාධිකරණ සහ අභියාචනාධිකරණ නඩු තීන්දු ලබා දිය යුතු භාෂාව සිංහල භාෂාව විය යුතුද? යන ප්‍රශ්නය ජනමතවිචාරණයකට යොමු කරන ලෙස ජනාධිපතිවරයාගෙන් කරන ඉල්ලීමට සහාය දෙන්න...
නීතිඥ අරුණ ලක්සිරි උණවටුනගෙන් ජනතාවට ඉල්ලීමක්....
ශ්‍රේෂ්ඨාධිකරණ සහ අභියාචනාධිකරණ නඩු තීන්දු රටේ බහුතර ජනතාවට කියවිය හැකි පරිදි සිංහල භාෂාවෙන් ලබා ගැනීම වෙනුවෙන් වන වැඩසටහන
අංක 09, කොළඹ පාර, හදපාන්ගොඩ.(10524)
දුරකථන 0342256066, 0342256067, 0712063394.
ගරු මෛත්‍රීපාල සිරිසේන මැතිතුමා
ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනාධිපති,
ජනාධිපති ලේකම් කාර්‍යාලය,
කොළඹ 01.
ශ්‍රේෂ්ඨාධිකරණ සහ අභියාචනාධිකරණ නඩු තීන්දු ලබා දිය යුතු භාෂාව සිංහල භාෂාව විය යුතුද? මැයෙන් ජනමතවිචාරණයක් පවත්වන ලෙස ඉල්ලා සිටීම.
නීතිය නොදැනීම සමාවට කරුණක් නොවේ...! යන නීති සිද්ධාන්තය අනුව රටේ බහුතර ජනතාව භාෂාව මත වෙනස්කමකට ලක් නොකල යුතු අතර නීතිය දැන ගැනීමට ඇති මාර්ග අවහිර නොකළ යුතුය.
රටේ පාලන ආයතන 3 අතරින් විධායකය විසින් ගනු ලබන තීරණත්, ව්‍යවස්ථාදායකය විසින් ගනු ලබන තීරණත් රටේ බහුතර ජනතාවගේ භාෂාවෙන් එනම් සිංහල භාෂාවෙන්ද ගනු ලබන හෙයින් ඒවා ජනතාවට සන්නිවේදනය වේ. එසේ වුවත් බහුතර ජනතාවට සන්නිවේදනය නොවන්නේ ශ්‍රේෂ්ඨාධිකරණය සහ අභියාචනාධිකරණය ගන්නා තීරණ වේ.
ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ගේ අදහස් රටේ බහුතරයක් වූ සිංහල ජනතාවද දැන ගත යුතුය.
ශ්‍රේෂ්ඨාධිකරණයට සහ අභියාචනාධිකරණයට නඩු කටයුතු සිදුකිරීමට සහ නඩු තීන්දු ඉංග්‍රීසි භාෂාවෙන් ලබා දීමට ආණ්ඩුක්‍රම ව්‍යවස්ථාවේ 24 ව්‍යවස්ථාව යටතේ 'ගැසට් පත්‍රයක්' මගින් අවසර ලබාදීමට අධිකරණ විෂය බාර ඇමතිවරයාට විධිවිධාන සළසා දී ඇත.
මෙය ජනතාවගේ අධිකරණ බලය සම්බන්ධව ජනතාවගේ පරමාධිපත්‍යය නොව කිහිප දෙනෙකුගේ භාෂා පරමාධිපත්‍යය වෙනුවෙන් අධිකරණ විෂය බාර ඇමතිවයා සිදුකරන පෙනී සිටීමකි.
එමෙන්ම මෙය රාජ්‍ය භාෂාව, ජාතික භාෂාව, පරිපාලන භාෂාව, නීති පැනවීමේ භාෂාව සහ අධිකරණ භාෂාව සිංහල භාෂාව බවට ආණ්ඩුක්‍රම ව්‍යවස්ථාව යටතේ දක්වා ඇති ප්‍රතිපාදනවලට පටහැනි තත්ත්වකි.
එමෙන්ම ආණ්ඩුක්‍රම ව්‍යවස්ථාවේ 1වන ව්‍යවස්ථාවේ දැක්වෙන ශ්‍රී ලංකාව නිදහස්, ස්වෛරී, ස්වාධීන , ප්‍රජාතාන්ත්‍රික , සමාජවාදී ජනරජය යන නම් කිරීමටද පටහැනි තත්ත්වයකි.
රටේ බහුතර ජනතාවට සිදුකරන මේ භාෂා අසාධාරණය වැළැක්වීම සදහා ආණ්ඩුක්‍රම ව්‍යවස්ථාවේ 3, 4 සහ 86 ව්‍යවස්ථා යටතේ ජනාධිපතිවරයා වන ඔබට ආණ්ඩුක්‍රම ව්‍යවස්ථාවෙන් බලතල ලැබී ඇති බව පෙන්වාදෙන අතර ජාතික වැදගත්කමකින් යුත් පහත ප්‍රශ්නය වහාම ජනමතවිචාරණක් මගින් ජනතාවගෙන් විමසීමට ලක් කරන ලෙස ගෞරවයෙන් ඉල්ලා සිටිමි.
ප්‍රශ්නය - ශ්‍රේෂ්ඨාධිකරණ සහ අභියාචනාධිකරණ නඩු තීන්දු ලබා දිය යුතු භාෂාව සිංහල භාෂාව විය යුතුද?
මෙම ප්‍රශ්නය ජනමතවිචාරණයක් මගින් ජනතාව වෙත යොමු කරන ලෙස ඉල්ලමින් පුරවැසියන් 100ක් විසින් කැමැත්ත ලබා දී අත්සන් කරන ලද නම, ලිපිනය සහ අත්සන සහිත ලේඛනයක්ද මේ සමග ඉදිරිපත් කරමි.
මෙයට,
විශ්වාසී
නීතිඥ අරුණ ලක්සිරි උණවටුන
සමායෝජක,
ශ්‍රේෂ්ඨාධිකරණ සහ අභියාචනාධිකරණ නඩු තීන්දු රටේ බහුතර ජනතාවට කියවිය හැකි පරිදි සිංහල භාෂාවෙන් ලබා ගැනීම වෙනුවෙන් වන වැඩසටහන.
පිටපත්
1. අධිකරණ විෂය භාර අමාත්‍ය
2. සභාපති, රාජ්‍ය භාෂා කොමිෂන් සභාව
Comments
Post a Comment