ශ්‍රේෂ්ඨාධිකරණ තීරණ උල්ලංඝනය කරමින් 70 ව්‍යවස්ථාව සංශෝධනය කිරීමට නීතිපති දෙපාර්තමේන්තුව 2015 දී යහපාලන රජයටත් 2020 දී වත්මන් රජයටත් උපදෙස් දුන්නේ ඇයි?

ශ්‍රේෂ්ඨාධිකරණ තීරණ උල්ලංඝනය කරමින් 70 ව්‍යවස්ථාව සංශෝධනය කිරීමට නීතිපති දෙපාර්තමේන්තුව 2015 දී යහපාලන රජයටත්  2020 දී වත්මන් රජයටත් උපදෙස් දුන්නේ ඇයි?

අරුණ ලක්සිරි උණවටුන B.Sc(Col), PGDC(Col), නීතිඥ  (2020.09.02)

ගෝඨාභය රාජපක්ෂ ජනාධිපතිවරයා බලයට පත් වූයේ 19ය අහෝසි කරන බව කියමිනි. 19ය අහෝසි කිරීම සදහා ජනාධිපතිවරයාට පාර්ලිමේන්තුවේ 2/3 ක මන්ත්‍රී ආසන සංඛ්‍යාවක්ද හිමි විය. 19ය සංශෝධනය කරන්නට යන ආකාරය ශ්‍රේෂ්ඨාධිකරණ තීරණ උල්ලංඝනය කරමින් නම් එය යහපත් තත්ත්වයක් නො වේ.

මේ වන විට 19 සංශෝධනය සදහා කියමින් 2020.09.02 දිනැතිව විසිවන ආණ්ඩුක්‍රම ව්‍යවස්ථා සංශෝධන පනත් කෙටුම්පත නිකුත් කර ඇත.

LINK - පිවිසෙන්න

20 කෙටුම්පත

එහි මුල් පිටුව මෙසේ ය.

මේ වන විට 2020.09.02 දිනැතිව නිකුත් කර ඇති විසිවන ආණ්ඩුක්‍රම ව්‍යවස්ථා සංශෝධන පනත් කෙටුම්පතේ 14වන වගන්තිය මගින් ඉතා වැදගත් ආණ්ඩුක්‍රම ව්‍යවස්ථා සංශෝධනයක් හදුන්වා දී ඇත.

ඒ ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කිරීමය. එය මෙසේ ය.

ඒ අනුව පැහැදිලි වන්නේ 2020.09.02 දිනැතිව නිකුත් කර ඇති විසිවන ආණ්ඩුක්‍රම ව්‍යවස්ථා සංශෝධන පනත් කෙටුම්පතේ 14වන වගන්තිය මගින් ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කිරීමට අපේක්ෂා කරන බවයි.

මෙහිදී ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කරන්නට යන්නේ 2002 දී පාර්ලිමේන්තුවට ඉදිරිපත් කළ පළමු 19 වන ආණ්ඩුක්‍රම ව්‍යවස්ථා සංශෝධන පනත් කෙටුම්පතට ශ්‍රේෂ්ඨාධිකරණයේ විනිසුරුවරුන් 07 දෙනෙකු ලබා දී ඇති ඒකමතික තීරණය උල්ලංඝනය කිරීමෙනි.

2002 දී පාර්ලිමේන්තුවට ඉදිරිපත් කළ 19වන ආණ්ඩුක්‍රම ව්‍යවස්ථා සංශෝධනය මගින් ඉතා වැදගත් ආණ්ඩුක්‍රම ව්‍යවස්ථා සංශෝධනයක් යෝජනා කර තිබූ අතර, ඒ ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කර ජනාධිපතිවරයාට වසරකට පසු පාර්ලිමේන්තුව විසුරුවාහැරීමට තිබු බලය / අයිතිය අහිමි කිරීමයි.

2002 එම 19 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත ආණ්ඩුක්‍රම ව්‍යවස්ථාට පටහැනිය යන පදනමින් ශ්‍රේෂ්ඨාධිකරණයේ අභියෝගයට ලක්කරන ලද අතර සරත් නන්ද සිල්වා (අ.වි), වඩුගොඩුපිටිය (වි), බණ්ඩාරනායක (වි) ඉස්මයිල් (වි) එදිරිසූරිය (වි) සහ යාපා (වි) ද සිල්වා (වි) විසින් 2002 ඔක්තෝබර් 1 සහ 3 යන දිනවල ඒ සම්බන්ධව ශ්‍රේෂ්ඨාධිකරණයේ විභාගයට ගන්නා ලදී.

එකී විභාගය අවසානයේ ශ්‍රේෂ්ඨාධිකරණයේ විනිසුරුවරු 7දෙනා ඒකමතිකව තීරණය කර තිබුණේ ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කර ජනාධිපතිවරයාට වසරකට පසු පාර්ලිමේන්තුව විසුරුවීම සීමාකිරීම ආණ්ඩුක්‍රම ව්‍යවස්ථාවේ 3වන ව්‍යවස්ථාවට සම්බන්ධ හෙයින් එකී 19 නීතියක් වීමට පාර්ලිමේන්තුවේ නොපැමිණි මන්ත්‍රීවරුන්ද ඇතුලුව 2/3 ඡන්දයෙන් සහ ජනමතවිචාරණයක් මගින් ජනතාව විසින්ද අනුමැතිය ලබා දිය යුතු බවයි.

කිසිවෙකුට හෝ ඒ සම්බන්ධයෙන් යම් සැකයක් ඇත්නම් 2002 දී පාර්ලිමේන්තුවට ඉදිරිපත් කළ 19යට ශ්‍රේෂ්ඨාධිකරණය ලබා දුන් එකී තීරණය කියවීමෙන් එකී සැකය නිරාකරණය කරගත හැකිය.

2002 දී පාර්ලිමේන්තුවට ඉදිරිපත් කළ 19වන ආණ්ඩුක්‍රම ව්‍යවස්ථාවේ සංශෝධනය එකී ශ්‍රේෂ්ඨාධිකරණ තීරණයේ තිබූ ජනමතවිචාරණයක අවශ්‍යතාවය හේතුවෙන් එතනින්ම අවසන් විය.

2002 දී නීතිපති දෙපාර්තමේන්තුවේ සිටි ප්‍රධානීන් එකී ශ්‍රේෂ්ඨාධිකරණ තීරණය උල්ලංඝනය කරමින් ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කිරීමට එවකට රජයට සහාය නොදුන්නද 2015 දී නීතිපති දෙපාර්තමේන්තුවේ සිටි ප්‍රධානීන් නැවත 19 වන ආණ්ඩුක්‍රම ව්‍යවස්ථා සංශෝධනය පාර්ලිමේන්තුවට ඉදිරිපත් කර ජනාධිපතිවරයාට වසරකට පසු පාර්ලිමේන්තුව විසුරුවීම සීමා කිරීමට ආණ්ඩුක්‍රම ව්‍යවස්ථාවේ 70වන ව්‍යවස්ථාව සංශෝධනය කිරීමට යහපලන රජයට සහාය දීමට ක්‍රියාකර තිබුණි.

2015 දී නීතිපති දෙපාර්තමේන්තුවේ සිටි ප්‍රධානීන්ගේ මෙම ක්‍රියාව ව්‍යවස්ථා විරෝධී වනවා මෙන්ම ශ්‍රේෂ්ඨාධිකරණ තීරණ උල්ලංඝනය කිරීමක්ද, සිය ධූරයේ බලතල අයුතු ලෙස යෙදවීමක්ද ජනතාව රැවටීමක්ද, ව්‍යවස්ථාපිත යුතුකම පැහැරහැරීමක්ද වේ. නීතිපති දෙපාර්තමේන්තුවේ නිලධාරීන් මේ ආකාරයට ශ්‍රේෂ්ඨාධිකරණ තීරණවලට අනුගත නොවී කටයුතු කිරීම සමාජයට දෙන්නේ නරක පූර්වාදර්ශයකි.

කෙසේ වෙතත් මේ වන විට ආණ්ඩුක්‍රම ව්‍යවස්ථාවේ 70වන ව්‍යවස්ථාව අනුව ජනාධිපතිවරයාට සිය අභිමතයට අනුව පාර්ලිමේන්තුව විසුරුවීම වසර 4 ½ ක් යන ‍තෙක් වළක්වා ඇත. මෛත්‍රීපාල සිරිසේන ජනාධිපතිවරයා විසින් 2018 දී පාර්ලිමේන්තුව විසුරුවීම ශ්‍රේෂ්ඨාධිකරණය විසින් නීති විරෝධීබව තීන්දු කිරීමෙන් පෙනී යන්නේ 1978 තිබූ ආණ්ඩුක්‍රම ව්‍යවස්ථාවේ 70 ව්‍යවස්ථාව මේ වන විට සංශෝධනය වී ඇති බවයි.

එසේනම් 2002 දී 70වන ව්‍යවස්ථාව සංශෝධනය කිරීමට ජනමතවිචාරණයක් අවශ්‍ය බව කියූ ශ්‍රේෂ්ඨාධිකරණ විනිසුරු 07 දෙනාගේ තීරණය අනුව 2020 දී  ඉදිරිපත් කරන විසිවන ආණ්ඩුක්‍රම ව්‍යවස්ථා සංශෝධන පනත් කෙටුම්පතේ 14වන වගන්තිය මගින් ආණ්ඩුක්‍රම ව්‍යවස්ථාවේ 70වන ව්‍යවස්ථාව ජනමතවිචාරණයක් නොපවත්වා සංශෝධනය කරන්නේ ‍කෙසේද? යන ගැටළුව පැන නගී.

කෙසේ වෙතත් මේ වන විට 2020 දී  ඉදිරිපත් කරන විසිවන ආණ්ඩුක්‍රම ව්‍යවස්ථා සංශෝධන පනත් කෙටුම්පතේ 14වන වගන්තිය මගින් ආණ්ඩුක්‍රම ව්‍යවස්ථාවේ 70වන ව්‍යවස්ථාව ජනමතවිචාරණයක් නොපවත්වා සංශෝධනය කිරීමට හැකි බව නීතිපති දෙපාර්තමේන්තුවේ වර්තමාන ප්‍රධානීන් තීරණය කර ඇති අතර එය පැහැදිලිවම 2002 දී 70වන ව්‍යවස්ථාව සංශෝධනය කිරීමට ජනමතවිචාරණයක් අවශ්‍ය බව කියූ ශ්‍රේෂ්ඨාධිකරණ විනිසුරු 07 දෙනාගේ තීරණයට පටහැනි තත්ත්වයකි.

“වැටත් නියරත් ගොයම් කානම් කාට කියනුද ඒ අමාරුව” යන්න පැරණි කියමනකි. ශ්‍රේෂ්ඨාධිකරණ තීරණ උල්ලංඝනය කරමින් 70 ව්‍යවස්ථාව සංශෝධනය කිරීමට නීතිපති දෙපාර්තමේන්තුව 2015 දී යහපාලන රජයටත්  2020 දී වත්මන් රජයටත් උපදෙස් දුන්නේ ඇයි? යන්න තීරණය කිරීමට තවම කල් වැඩිය.

මේ වනවිට 2015 දී ඉදිරිපත් කළ 19වන ආණ්ඩුක්‍රම සංශෝධනයට සම්බන්ධ කුමන්ත්‍රණකරුවන් සියලු දෙනා සමාජයේ නිරාවරණ වීම ආරම්භ වී ඇත.

ඇතිවන ගැටළුව වන්නේ ශ්‍රේෂ්ඨාධිකරණය ඇතුළු අධිකරණවලට අපහාස කරන සාමාන්‍ය තැනැත්තන්ට එක් ආකාරයකටත් නීතිපති දෙපාර්තමේන්තුවේ ප්‍රධානීන් ශ්‍රේෂ්ඨාධිකරණ තීරණ නොතකා කටයුතු කරමින් අධිකරණයට අපහාස කරන විට වෙනත් අකාරයකටත් කටයුතු කරන යුක්තිය පසිදලන යාන්ත්‍රණයක් මෙරට පැවතීමය.

arunaunawatuna@gmail.com