බණ්ඩාරණායක, රාජපක්ෂ දරුවන් එක්සත් ජාතික පක්ෂයේ ආර්ථික, දේශපාලන ප්‍රතිපත්ති තුළට ගැනීම එක්සත් ජාතික පක්ෂයේ දිනුමක්ද? රටේ දිනුමක්ද?

බණ්ඩාරණායක, රාජපක්ෂ දරුවන් එක්සත් ජාතික පක්ෂයේ ආර්ථික, දේශපාලන ප්‍රතිපත්ති තුළට ගැනීම එක්සත් ජාතික පක්ෂයේ දිනුමක්ද? රටේ දිනුමක්ද?

එදා බණ්ඩාරනායක සහ ඩී.ඒ. රාජපක්ෂ එක්සත් ජාතික පක්ෂයෙන් ඉවත් වුණේ ස්වදේශීය ආර්ථික, දේශපාලන ප්‍රතිපත්ති වෙනුවෙන් බව ප්‍රකාශ කිරීමෙනි. (1951 ජූලි 24 දා පාර්ලිමේන්තු හැන්සාඩ් වාර්තාව) පසුව අනුර බණ්ඩාරනායක, චන්ද්‍රිකා බණ්ඩාරනායක එක්සත් ජාතික පක්ෂයේ ප්‍රතිපත්ති සමග එකතු විය. සිරිමාවෝ බණ්ඩාරනායකගේ ප්‍රජා අයිතිය එක්සත් ජාතික පක්ෂය විසින් අහෝසි කළද ඇය සිය ස්වදේශීය හිතැති ප්‍රතිපති මිය යන තෙක්ම වෙනස් කළේ නැත. බෙලිඅත්ත මන්ත්‍රීවරයාව සිටි ඩී.ඒ. රාජපක්ෂ 1951 ජූලි 24 දා එකසත් ජාතික පක්ෂයෙන් ඉවත් වී විපක්ෂයේ අසුන් ගනිමින් පාර්ලිමේන්තුවේ කළ කතාව පාර්ලිමේන්තු හැන්සාඩ් වාර්තාවේ ඇත. එම කතාවේ සෑම වචනයක්ම අද දවසේත් ඒ ආකරයෙන්ම වලංගු වේ. රාජපක්ෂ පුතුන් දෙදෙනෙකු ජනාධිපති වුවත් ඔවුන් කිසිවෙක් ඩී.ඒ. රාජපක්ෂ මන්ත්‍රීවරයා 1951 ජූලි 24 දා පාර්ලිමේන්තුවේ කළ කතාව කියවා තිබුණානම් අද රට මේ ආකාරයට සිඟමන් යදින තත්ත්වයට පත්වන්නේ නැත. ගෑස් පෝලින්, ඉනධන පෝලින් සහ විදුලි කප්පාදුව තුළණය කරන්නේ රටේ දේපළ සහ ආයතන විදෙස් සමාගම්වලට හිමිකර දීමෙන් වූවාට ජනතාවට ප්‍රශ්නයක් නැති තැනට අද රට පත් වී තිබේ. පළාත් සභා සහ සමානුපාතික ඡන්ද ක්‍රමය තිබියදී ජනාධිපති ධූරය ඉවත් කර ජනාධිපතිවරණ ඡන්ද බලය ජනතාවගෙන් ඉවත් කළද ජනතාවට ගැටළුවක් නොවන තැනට ජීවන ප්‍රශ්න වලින් ජනතාව ආවරණය වී ඇත. ආණ්ඩුක්‍රම ව්‍යවස්ථාවේ 83, 3, 9 ව්‍යවස්ථා ආරක්ෂා කිරීමක් ගැන ජනතාවට සිතීමට වේලාවක් නැත්තේ ඒ සිතන ජනතාව ඩීසල්, පෙට්‍රල් සහ ගෑස් ලබා ගන්නේ කෙසේද යන්න කල්පනා කරන හෙයිනි. මේ වන විට රාජපක්ෂ පුතුන් සහ මුණුඹුරන් එක්සත් ජාතික පක්ෂයේ නායකයා තමන්ගේ නායකයා ලෙස පත් කරගෙන ඇත. එක්සත් ජාතික පක්ෂය විසින් නුදුරේදී ගෙනෙන ආණ්ඩුක්‍රම ව්‍යවස්ථා සංශෝධනය 2/3 බහුතර ඡන්දයෙන් පාර්ලිමේන්තුවේදී සම්මත වෙනවා බලාගත හැකිය. ඒ ශ්‍රී ලංකාවේ දේශපාලන චින්තනයේ හැටිය. මෙවැනිම තත්ත්වයක් 2015 දී මෛතීපාල සිරිසේන මහතා ජනාධිපති වූ අවස්ථාවේදීත් දක්නට ලැබුණි. අඩු මන්ත්‍රී පිරිසක් සිටි විපක්ෂ නායකයාව අගමැති කරමින් බහුතරය ග්‍රහණයට ගෙන 2015 දී 19වන ආණ්ඩුක්‍රම ව්‍යවස්ථා සංශෝධනය ගෙනාවේත් ඉදිරියේ 21 ගේන්න යන ආකාරයටමය. බණ්ඩාරනායක, ඩී.ඒ.රාජපක්ෂ ස්වදේශීය චින්තනයෙන් රට දියුණු කිරීමට තිබූ දැක්ම ඔවුන්ගේ දරුවන්ගෙන් ඈත් වී ඇත. දිනකට එන්ජින් දහස් ගණනක් දුවන අධිවේග මාර්ග තැනීමත්, දිනකට එන්ජින් දහයක් විස්සක් දුවන අධිවේග දුම්රිය මාර්ග නොතැනුවේත් මේ වෙනස් විදේශීය සමාගම් හිතැති ආර්ථික ප්‍රතිපත්ති හේතුවෙනි. අහස උසට නගින ගොඩනැගිලි තනමින් විදෙස් සමාගම් වාර්ෂිකව නඩත්තු කිරීමට රාජපක්ෂ, බණ්ඩාරනායක දරුවන් උපායශීලීව මෙහෙවනු ලැබූවත්, ගොවිතැන දියුණු කරමින් ඉන් ඩොලර් ඉපැයීමට ඔවුන්ව මෙහෙයවනු නොලැබූයේ මේ වෙනස් ආර්ථික ප්‍රතිපත්ති හේතුවෙනි. රාජපක්ෂ දරුවෝද බණ්ඩාරනායක දරුවන් මෙන් එක්සත් ජාතික පක්ෂය තමන්ගේ අනාගත දේශපාලන ක්‍රීඩා බිම කර ගැනීමට සිදුවීම දෛවයේ කියවීමකි. ඒ අනුව පැහැදිලි වන්නේ එදා එදා බණ්ඩාරනායක සහ ඩී.ඒ. රාජපක්ෂ මන්ත්‍රීවරු එක්සත් ජාතික පක්ෂයෙන් ඉවත් වුණ ප්‍රතිපත්ති වෙනස මේ වන විට සමනය වී ඇති බවයි. එනම් එක්සත් ජාතික පක්ෂයේ ආර්ථික සහ දේශපාලන ප්‍රතිපත්ති බණ්ඩාරනායක සහ රාජපක්ෂ දරුවන් නිවැරදි බව තේරුම් ගෙන ඇති බවයි. බණ්ඩාරණායක, රාජපක්ෂ දරුවන් එක්සත් ජාතික පක්ෂයේ ආර්ථික දේශපාලන ප්‍රතිපත්ති තුළට ගැනීම එක්සත් ජාතික පක්ෂයේ දිනුමක්ද? රටේ දිනුමක්ද? යන්න විසඳීමේදී බණ්ඩාරනායක සහ රාජපක්ෂ පියවරුන්ට 1951 වැරදුනා යන්න පිළිගෙන පිළිතුරු සෙවීමට වර්තමාන අසාර්ථක ආර්ථික පරිසරය දිශානති වෙමින් ඇත. ස්වදේශීය ආර්‍ර්ථිකය වෙනුවට ව්දේශීය සමාගම් මගින් මෙහෙයවන ආර්ථිකයක් ශ්‍රී ලාංකිය දූපතට හො‍ඳද? නරකද? යන්න කීමට තවම කාලය ඉක්මන් වැඩිය. (බෙලිඅත්ත මන්ත්‍රීවරයාව සිටි ඩී.ඒ. රාජපක්ෂ 1951 ජූලි 24 දා එකසත් ජාතික පක්ෂයෙන් ඉවත් වී විපක්ෂයේ අසුන් ගනිමින් පාර්ලිමේන්තුවේ කළ කතාවේ පිටපතක් ලියුම්කරු විමසීමෙන් ලබා ගත හැකිය) නීතිඥ අරුණ ලක්සිරි උණවටුන B Sc(Col), PGDC(Col) (සමායෝජක) වෛද්‍ය තිලක පද්මා සුබසිංහ අනුස්මරණ නීති අධ්‍යයන වැඩසටහන. දුරකථන 0712063394) (2022.05.14)