හිටපු අගවිනිසුරු ජයන්ත ජයසූරිය මහතා විශ්‍රාම යෑමෙන් පසු එක්සත් ජාතින්ගේ ලංකාවේ නිත්‍ය නියෝජිත ධූරය ලැබීම, අධිකරණයේ ස්වාධීනත්වයට කරන බලපෑම, විසඳුම් සහ 19යේ වැරැද්දක් නිවැරදි කිරීමට ගෙනා 22...!

හිටපු අගවිනිසුරු ජයන්ත ජයසූරිය මහතා විශ්‍රාම යෑමෙන් පසු එක්සත් ජාතින්ගේ ලංකාවේ නිත්‍ය නියෝජිත ධූරය ලැබීම, අධිකරණයේ ස්වාධීනත්වයට කරන බලපෑම, විසඳුම් සහ 19යේ වැරැද්දක් නිවැරදි කිරීමට ගෙනා 22...!

2015 දී ගෙනා 19වන ආණ්ඩුක්‍රම ව්‍යවස්ථා සංශෝධනයේ ජනාධිපති සහ පාර්ලිමේන්තු ධූරකාලයේ දෝෂයක් පවතින හෙයින් එය එක්තරා නීති විශාරදයකුගේ අතපසුවීමක් බවත් එයට ජනතාවගෙන් සමාව ගන්නා බවත් ගාල්ල අලුත් අධිකරණ සංකීර්ණය විවෘත කරන අවස්ථාවේ ජනාධිපතිවරයෙකු පැවසුවා සමහරුන්ට අමතක වී ඇත. ඒ වේදිකාවේ ජයන්ත ජයසූරිය අගවිනිසුරුද, පාරින්ද රණසිංහ නීතිපතිද, තවත් විනිසුරුවරුන්ද, රාජ්‍ය නිලධාරීන්ද අසුන්ගෙන සිටියේය. එසේම ආණ්ඩුක්‍රම ව්‍යවස්ථාවේ පවතින ඒ වැරැද්ද නිවැරදි කිරීමට නීතිපතිගේ අනුමැතියෙන් ආණ්ඩුක්‍රම ව්‍යවස්ථාවේ 78 වන ව්‍යවස්ථාව යටතේ 22වන ආණ්ඩුක්‍රම ව්‍යවස්ථා සංශෝධන පනත් කෙටුම්පතද මේ වන විට ගැසට් කර ඇත. ඒ අනුව පැහැදිලි වන්නේ අනුර දිසානායක ජනාධිපතිගේ සහ මාළිමා පාර්ලිමේන්තුවේ ධූර කාලය වසර 6ක් වන බවයි. මන්ද යත් ආණ්ඩුක්‍රම ව්‍යවස්ථාවේ 78වන ව්‍යවස්ථාව යටතේ ආණ්ඩුක්‍රම ව්‍යවස්ථා සංශෝධන පනත් කෙටුම්පතක් ගැසට් කළ අවස්ථාවක එය නීතිපතිගේ මතයද වේ. ඒ අනුව වත්මන් ආණ්ඩුක්‍රම ව්‍යවස්ථාවේ 83වන ව්‍යවස්ථාවේ දෝෂයක් පවතින බවත් එය නිවැරදි විය යුතුය යන්න නීතිපතිගේ ස්ථාවරයයි. ආණ්ඩුක්‍රම ව්‍යවස්ථාවේ පවතින 83වන ව්‍යවස්ථාවේ වැරැද්ද නීතිපතිට පෙනුනේ මේ වැරැද්ද ගැන පුරවැසියන් කිහිප දෙනෙකු ශ්‍රේෂ්ඨාධිකරණයේ නඩු පවරා ඒ වෙනුවෙන් ලකෂ ගණනින් නඩු ගාස්තු ගෙවීමෙන් පසුය. 22වන ආණ්ඩුක්‍රම ව්‍යවස්ථා සංශෝධන කෙටුම්පත ගෙන ඒමට/ ගැසට් කිරීමට හේතු වූ ආණ්ඩුක්‍රම ව්‍යවස්ථාවේ පවතින වැරැද්ද ජයන්ත ජයසූරිය අගවිනිසුරුවරයා අධ්‍යයනය නොකළේ එක්සත් ජාතීන්ගේ සංවිධානයේ නිත්‍ය නියෝජිත ධූරය විශ්‍රාම යාමෙන් පසු හිමිවන නිසාද යන්න මතු වන වැදගත් නෛතික සහ සමාජමය ප්‍රශ්නයයි. එක්තරා අගවිනිසුරුවරයෙකු තවත් ශ්‍රේෂ්ඨාධිකරණ විනිසුරුවරුන් සමඟ දුන් තීන්දු ගැන කම්පාවෙන්, පසුතැවෙමින් විශ්‍රාම යාමෙන් පසු "අනේ මට සමාවෙන්න" කී අයුරුද ජනතාවට අමතක විය නොහැකිය. විශ්‍රාම යාමෙන් පසු විනිසුරුවරුන් රජයේ ධූර ගන්නා විට (ස්වාධීන කොමිෂන් සභා හැර) එම විනිසුරුවරුන් ඊට පෙර ලබා දී ඇති අධිකරණ නියෝග පිළිබඳ සමාලෝචනය කිරීමට අවස්ථාව සැළසෙන නීති පැනවීමේ අවශ්‍යතාවය මෙවැනි තත්ත්වයන් හමුවේ ජනතාව අවබෝධ කර ගත යුතුය. අගවිනිසුරු ජයන්ත ජයසූරිය මහතා විශ්‍රාම යාමෙන් පසු එක්සත් ජාතීන්ගේ සංවිධානයේ නිත්‍ය නියෝජිත ලෙස පත්වීමේදී ධූර දරන විනිසුරුවරුන්ගේ ගුණාත්ම ප්‍රතිරූපය සහ අධිකරණ ස්වාධීනත්වය ජනතාවගේ පරමාධිපත්‍යය ඇසුරෙන් රැකිය හැක්කේ එවැනි නීති සංශෝධනයකින් ය. හිටපු අගවිනිසුරු ජයන්ත ජයසූරිය මහතා විශ්‍රාම යෑමෙන් පසු එක්සත් ජාතින්ගේ ලංකාවේ නිත්‍ය නියෝජිත ධූරය ලැබීම, අධිකරණයේ ස්වාධීනත්වයට කරන බලපෑම, විසඳුම් සහ 19වන ආණ්ඩුක්‍රම ව්‍යවස්ථා සංශෝධනයේ වැරැද්දක් නිවැරදි කිරීමට ගෙනා 22වන ආණ්ඩුක්‍රම ව්‍යවස්ථා සංශෝධන පනත් කෙටුම්පත ගැන නිදහස් චින්තකයන් විසින් ගැඹුරින් හැදෑරිම ප්‍රජාතන්ත්‍රවාදයට යහපත් වෙයි. නීතීඥ අරුණ ලක්සිරි උණවටුන B.Sc(Col), PGDC(Col) සමායෝජක, වෛද්‍ය තිලක පද්මා සුබසිංහ අනුස්මරණ නීති අධ්‍යයන වැඩසටහන. දුරකථන 0712063394 (2025.03.23)